LAOAG CITY – Mamati ni House Deputy Majority Leader ken La Union Rep. Paolo Ortega a maysa a dakkel a “fake news” ti inrakurak ni dati a Presidente Rodrigo Roa Duterte a mangideklara ti martial law ni Presidente Ferdinand “Bongbong” Marcos Jr. ken ti panangipasigurado a mapadisi ni Vice President Sara Duterte tapno agtalinaed daytoy iti puesto ken bileg.
Inawagan a Mr. Fake News ni Ortega ti dati a Presidente.
Ii biang ni Lanao del Sur Rep. Zia Alonto Adiong, tinagabassitna ti nagbalin a rakurak ni Duterte ken kunana nga adda ti karebbengan ti dati a Presidente iti bukudna nga opinyon ngem ti kaso kontra iti Bise Presidente ket addaan ti natibker ken legal a pangibasaran.
Inpetteng ni Adiong a dagiti kaso kontra ken ni Duterte ket maibasar iti maipagarup a saan nga umiso a panangusar iti confidential funds ken ti panangpangta kadagiti nangangato nga opisial ken saan nga isyu ti pulitika.
Ginutigot ni Adiong ti publiko nga ikkan ti importansia dagiti napapateg a pagsasaritaan ken saan nga agpaallilaw kadagiti taktika a pangpulitika a gagem a mapukaw ti pokus iti kaso.
Naminsan manen nga inpetteng ni Adiong a saan a nasken a laokan ti electoral politics seknan iti constitutional accountability.
