LAOAG CITY – Naragsak nga inpakaammo ni Bombo International News Correspondent Myles Beltran idiay Japan nga umabot iti 1,500 a Filipino ti nagatendar iti naisayangkat a Meet and Greet ni Presidente Ferdinand Bongbong Marcos Jr.
Inbatadna nga adu dagiti plano ti Presidente kadakuada nga Overseas Filipino Workers kas koma ti panangidiaya ti naruay a trabaho kabayatan ti kaaddada iti nasao a pagilian.
Kunana nga inkari ni Presidente Marcos a matungpal dagitoy a ganuat iti kabiitan a panawen tapno matulungan dagiti kadaraan a Filipino ken maipaayan ti ad-adu pay nga oportunidad.
Inlawlawagna a nagbalin met a naiget ti panangpastrekda kadakuada iti venue ti nakaangayan ti event kas ti panangbirukda ti ticket, masapol nga addaan ti QR Code ti tunggal maysa ken mangipakita ti ID sakbay dagitoy a mapalubusan a sumrek kas panangsurot ti pagannurutan.
Inbagana a gapu iti naisangsangayan ti panagbisita ni Pres. Marcos Jr. iti pagilian a Japan ket adda met dagiti nanggundaway a saanen a simrek pay iti pagtrabahoan tapno laeng makita ti Presidente iti personal.
Innayon ni Beltran nga iti agdama ket makumikom ti Presidente ken ti grupona iti panagsagsaganadan nga agawid ken agsubli ditoy Pilipinas kalpasan iti naiyuswat a Meet and Greet idiay Japan.
