LAOAG CITY – Binalakadan ni Presidente Bongbong Marcos dagiti benepisiario ti Presidential Financial Assistance iti rehion ti Bicol nga usarenda iti nasayaat a wagas dagiti naawatda a tulong.
Iti panagbitlana iti Camarines Sur, impalagip ti Presidente kadakuada nga usarenda ti tulong tapno ad-adda a mapalawa dagiti pagtaltalonan da ken negosioda.
Kagiddan iti daytoy ket ginutigut ti Presidente dagiti benipisiario a saan da a mabain nga umasideg kadagiti ahensia ti gobierno iti panawen ti panagkasapulanda nangruna no para iti pagsayaatan ti kasasaadda ken paggeddanda.
Mainaig iti daytoy ket nangipaay ni Presidente Marcos iti direktiba iti Department of Agriculture ken iti Department of Agrarian Reform nga itultuloy ti panangipaay ti daga ken serbisio nangruna kadagiti naapektaran iti El Niño.
Kabayatanna, naamuan nga agarup 2,000 nga Agrarian Reform Beneficiaries ti nakaawat ti land titles iti Camarines Sur.