LAOAG CITY – Naan-anayen a nagbalin a linteg ti Magna Carta of Filipino Seafarers a manipaay proteksion kadagiti Pilipino Seafarers ti pagilyan.
Pormal a pinirmaan ni Presidente Ferdinand Marcos Jr. ti Republic Act 12021 no sadinno a kunana a saan laeng a pammadayaw daytoy iti sakripisio dagiti Filipino seafarers no di ket mangiyeg pay iti boses kadakuada.
Malaksid iti panangipaay ti proteksion kadagiti Filipino seafarers, kinuna ti Presidente a masalaknibanda pay manipud iti saan a patas nga aramid ti panagtrabaho idinto a ti Magna Carta ket mangipasigurado pay iti natalged a kasasaad ti panagtrabaho para kadagiti Filipino seafarers.
Babaen ti baro a linteg, kinuna ti Presidente a maited met ti usto a panagsanay kadagiti maseknan tapno makageddan iti panaggaraw ti international maritime industry.
Inawagan pay ti Presidente dagiti Filipino seafarers nga “heroes of the modern world”, gapu ta malaksid kadagiti sakripisio a sagsagabaenda gapu iti kaadayoda iti pamiliada, sangsanguenda met ti nagduduma a peggad iti trabaho da.
