LAOAG CITY – Naiget nga inlibak ni Presidente Ferdinand Marcos Jr. a nangidiaya ti Indonesia ti “demand” tapno maipasidong ni dati a Bamban, Tarlac Mayor Alice Guo iti kustodiar ti Pilipinas.
Segun iti Presidente, daytoy nga isyu ket nairuar babaen iti saan nga opisial a pagiwarnakan ti Indonesia.
Nu pay kasta inadmitir ti chief executive a saan a nalaka ti panangisubli ken ni Guo ditoy pagilian.
Inadmitirna pay a kinasaritana dagiti gagayyemna idiay Indonesia idinto a nakatulong met ti ipapanna iti sabali a pagilian isu a nagbalin a nasinged ken ni Presidente Joko Widodo a palubosanna a maipasidong ken agsubli ti nagtalaw a mayor ditoy pagilian.
Maipalagip nga adda dagiti sayangguseng a kiniddaw ti Indonesia nga isukat ni Guo ken ni Gregor Haas, maysa nga Australiano a sapsapulen da idiay Indonesia gapu iti kaso a panaglako iti droga ken naarestar daytoy idiay probinsia ti Cebu idi Mayo iti daytoy a tawen.
