LAOAG CITY – Inmannamong ni Presidente Ferdinand ”Bongbong” Marcos Jr. iti plano dagiti agpanpanday-linteg a mangmonitor kadagiti flood control projects ti gobierno kalpasan ti nakaru nga epekto nga inbati ti Severe Tropical Storm Kristine.
Segun ken ni Pres. Marcos a masapul a tutokan a nalaing dagiti ahensya ti gobierno dagiti maar-aramid a flood control projects gapu ta nakabutbuteng no adda pay ti napigpigsa a bagyo a sumangbay ngem iti bagyo Kristine.
Maipalagip nga immunan nga impalgak ni Senate President Francis “Chiz” Escudero a kuestionaren dagiti senador dagiti maseknan nga ahensia iti budget allocation-da para kadagiti flood control projects gapu ta naruay dagiti nalayus a lugar ken dagiti nadadael a flood control projects.
Kabayatanna, namnamaen ni Escudero nga agsunbag ken maidatag nga isyu iti budget deliberations ti Department of Public Works and Highways (DPWH), Department of Environment and Natural Resources (DENR), Department of the Interior and Local Government (DILG), Department of Social Welfare and Development (DSWD), ken Department of National Defense – Office of Civil Defense (DND-OCD).
