LAOAG CITY – Inpanamnama ni Presidente Ferdinand ”Bongbong” Marcos Jr. iti publiko a naiget ti monitoring ti gobierno iti kasasaad ti pagilyan iti baet ti Bagyong Enteng.
Inpasigurado ni Marcos a nakasagana ti gobierno para iti posible a pagbanagan ti tropical storm.
Kinunana a suroten met dagiti maseknan nga ahensia ti standard operating procedures iti baet ti dakes a paniempo.
Innayonna a nakasagana amin a suplay, nangruna ti rescue team gapu ta naruayen dagiti nalayus a lugar iti National Capital Region (NCR).
Maipalagip nga immunan a binilin ni Presidente Marcos dagiti maseknan nga ahensia ti gobierno tapno siguraduenda a maipaay ti nasapa nga advisories no maipapan iti pannakasuspenso ti klase ken panagtrabaho gapu iti dakes a panawen.
