LAOAG CITY – Inbilin ni Presidente Ferdinand Marcos Jr. iti Department of Agriculture a mangidatag dagiti addang tapno maitultuloy ti “₱20 program” wenno panaglako ti ₱20 a kada kilo ti bagas agingga inton 2028.
Inbatad ni Agriculture Secretary Francisco Tiu Laurel iti inisyal a plano, maipatungpal ti programa agingga inton Disiembre 2025 wenno Pebrero 2026.
Adda ti 3.5 agingga iti 4.5 bilyon a pisos ti mausar a pundo ti gobierno para iti subsidiya iti nalaka a bagas depende iti run rate.
Inlawlawagna a ti pammilin ti Presidente a maipatungpal ti programa agingga iti panaglippas ti terminona.
Kuna ti sekretario, iti napalabas a tawen pay laeng a plano a maipatungpal ngem saan a kabaelan ti gobierno ti subidiya para iti daytoy gapu ta nangato ti presio ti bagas iti world market.
Nupay kasta, inpakaammo ni Laurel, bimmaba ti road market prices isu a limmag-an ti subsidya nga ilatang para iti programa.
