LAOAG CITY – Manamnama nga atendaran da Pres. Ferdinand Marcos Jr., Department of Education Secretary Juan Edgardo “Sonny” Angara pakairamanan dagiti opisial ti probinsia iti panangidaulo da Gov. Matthew Marcos Manotoc ken ni Vice Gov. Cecilia Araneta-Marcos iti opening ceremony ti Palarong Pambansa 2025.
Ti nasao nga aktibidad ket mangrugi inton Mayo 24 ken agngudo intono Mayo 30.
Manamnama a makipapaset ti 17 a ribu nga atleta, coaches, school officials ken technical personnel manipud iti sangapulo ket pito a rehion iti intero a pagilian.
Ti tema ti Palaro ita a tawen a “Nagkakaisang Kapuluan” ket pasingkedanna ti panagkaykaysa ti pagilian babaen ti “sports.”
Mainaig iti daytoy, mamati ni Gov. Manotoc a dakkel a nakatulong iti panagsagana ti probinsia iti Palarong Pambansa ti balligi a pannakaisayangkat dagiti nagdumaduma a national ken international competition kas ti rowing, basketball, volleyball, cycling, surfing, ken dadduma pay nga aktibidad.
Malaksid iti daytoy, dakkel ti pammati ti Gobernador a mangipaay ti naruay a pagsayaatan ti probinsia daytoy a panag-host-na ti Palarong Pambansa iti benneg ti ekonomia nangnangruna iti turismo, transportasion ken dagiti babassit a negosio.
Kagiddan daytoy, kunana a daytoy ti mangpatalged ti naiget a kalikagum ti gobierno a mangitandudo iti “grassroots sports development” ken ti mangimula iti panunut dagiti agtutubo ti kinapateg ti disiplina, teamwork ken nasayaat a kababalin.
