LAOAG CITY – Ur-urayen pay laeng ni Presidente Ferdinand Marcos Jr. ti isubmitir a shortlist ti Judicial and Bar Council (JBC) dagiti nominee para iti panagpili na ti baro nga Ombudsman.
Inbatad ti Presidente a mangdutok laeng isuna ti baro nga Ombudsman no nakumpleton ti selection process.
Iti PBBM Podcast interview, kuna ti presidente nga iti agdama ket mangiyus-uswat pay laeng ti JBC ti deliberasyon ken interview para iti nasao a posisyon nga iti agdama ket bakante.
Basar iti Konstitusyon, agingga iti Oktubre 25 laeng ti pawayway tapno mangdutok ti presidente ti baro a mangidaulo iti anti-graft office.
Ti Office of the Ombudsman ket maysa a constitutional independent body nga addaan ti mandato a dagus na nga aksyunan dagiti reklamo kontra kadagiti opisyal ti gobierno ken siguradoen ti accountability iti serbisyo publiko.
Maipalagip nga idi Agosto 27, temporary a dinutukan ti presidente ni Deputy Ombudsman for Visayas Dante Vargas kas Acting Ombudsman.
