LAOAG CITY – Adda idiay Jakarta, Indonesia ni Pres. Ferdinand Marcos Jr. ken First Lady Liza Marcos tapno agatendar iti pannakainagunar ni President-elect ti Indonesia a ni Prabowo Subianto ken Vice President-elect a ni Gibran Rakabuming Raka.
Ita nga aldaw, October 20, 2024 naiyuswat ti inagurasion.
Idi rabii simmangpet iti Soekarno-Hatta International Airport idiay Jakarta, Indonesia ni Pres. Marcos kaduana ni First Lady Liza Araneta Marcos no sadinno sinarabo isuda ni General (Ret.) Muhammad Tito Karnavian, Indonesia’s Minister of Home Affairs pakairamanan dagiti sumagmamano nga opisial ti Indonesian government ken representatives manipud iti Philippine Embassy idiay Indonesia.
Ti panagbisita da Pres. Marcos ken First Lady idiay Indonesia ket basar iti nagbalin nga imbitasion ni Indonesian President Joko Widodo.
Selselebraran ti Pilipinas ken Indonesia ti maika-75 nga anibersario ti formal diplomatic relations.
Ti panagatendar ti Presidente ken First Lady iti inagurasion ken maminsan manen a panangpatibker iti nasinged a panagpagayam ti dua a pagilian.
Naammoan a kadagiti naiyuswat nga exchange visits ket ad-adda pay a pimmigsa ti bilateral relations iti nagbaetan ti Pilipinas ken Indonesia.
