LAOAG CITY – Nakikaysa ni Presidente Ferdinand Marcos Jr. iti panawagan dagiti nagduduma a lider iti intero a lubong nga agsarita a nakappia ken diplomasia iti kumarkaro a tension iti nagbaetan ti Iran ken Israel.
Inbatad ni Palace Press Officer Atty. Claire Castro a marikna ti gobierno ti panagamak dagiti pagilian iti panagsinnukat ti missile attack ti dua a pagilian gapu iti epekto daytoy saan laeng kadagiti umili ti Iran ken Israel no di ket mairaman ti ekonomia.
Kunana a kalikagum ni Presidente Marcos nga ikalintegan ti kinappia tapno agbalin a global community.
Inadmitir ni Castro a maaddaan ti nakaro nga epekto ti mapaspasamak a riribuk iti nagbaetan ti Israel ken Iran isu a mangnamnama ti Palasyo a maaddaan ti solusion ti mapaspasamak a tension kadagiti nasao a dua a pagilian.
Inlawlawagna nga uray adda ti fuel subsidy ti gobierno noo bilang ngumato ti presio ti langis iti world market, inpetteng ni Castro a karaman pay a maapektaran iti gubat ti logistics ken trading ti langis.
Gapu iti daytoy, nagkiddaw ti panagkararag ni Castro tapno maikkan daytoy ti napintas a solusion tapno saan unay a nadagsen ti mapasaran dagiti umili gubuay iti tension iti nagbaetan ti Israel ken Iran.
