LAOAG CITY – Nangipaulog ni Presidente Ferdinand Marcos Jr. iti executive order a mangingato iti suweldo ken mangted iti kanayonan nga allowance kadagiti mangmangged iti gobierno.
Inpakaammo ti Presidential Communications Office (PCO) nga inruar ni Pres. Marcos nga Executive Order No. 64, a pinirmaan ni Executive Secretary Lucas Bersamin idi Agosto 2, 2024.
Kinuna ti Malacañang nga epektibo a dagus ti bilin inton pormal a maipablaak iti opisyal a page da.
Nakailanad iti bilin a ti naudi a pannakabalbaliw ti sueldo dagiti trabahador ti gobierno ket idi 2023, idi nagleppas ti maikapat ken maudi a paset ti nabaliwan nga iskediul ti sueldo iti sidong ti Salary Standardization Law of 2019.
Saklawen ti kaudian a bilin ti presidente ti amin a civilian government personnel iti Executive, Legislative ken Judicial Branches; pakairamanan ti Constitutional Commissions ken dadduma pay a Constitutional Offices.
Sakupen pay iti salary adjustments dagiti trabahador iti government-owned or controlled corporations (GOCCs) ken local government units (LGUs).
Mainaig iti daytoy, maipatungpal ti salary increase kadagiti uppat a tranches, a ti umuna ket epektibo inton Enero 1, 2024, maikadua inton Enero 1, 2025, maikatlo idi Enero 1, 2026, ken maikapat idi Enero 1, 2027.
Maipalagip nga immuna nga imbatad ti Department of Budget and Management (DBM) nga inyalokarda ti P70 billion iti naisingasing a P6.352-trillion national budget inton sumaruno a tawen tapno masakupan dagiti kasapulan a pondo para iti umuna ken maikadua a paset ti pannakabalbaliw ti sueldo dagiti mangmangged iti bureaucracy.
Pinasingkedan pay ti Malacañang a retroactively ti epekto ti ExecutiveOrder 64, kayatna a sawen nga epektibo ti umuna a tranche ti implementasion idi Enero 1, 2024.
Malaksid iti salary adjustment, namnamaen pay dagiti mangmangged iti gobierno iti medical allowance a P7,000 iti kada tawen kas subsidy para iti pannakagun-od dagiti health maintenance organization (HMO)-type benefits.
Binilin pay ti Presidente ti Department of Budget and Management a mangipaulog kadagiti pagannurotan a kasapulan tapno maipatungpal dagiti espesipiko a probision ti Executive Order 64.
Nupay kasta, saan nga maiyaplikar ti panagngato ti sueldo kadagiti job order, contract of service, consultancy wenno service contracts nga awanan ti employer-employee relationship.
Kabayatanna, saan pay a sakupen ti executive order dagiti agtartrabaho kadagiti government-owned or controlled corporations, a sakupen ti agsina a Compensation and Position Classification System.
