LAOAG CITY – Adda ti pammilin ni President Ferdinand Marcos Jr. kenni Ilocos Norte 1st District Rep. Sandro Marcos nga ipaayna ti naan-anay a suportana ditoy ciudad ti Laoag nga idaulwan ni Mayor Bryan Alcid.
Segun kenni Congressan Marcos, kalikagom ti presidente nga amin a banag a para iti pagsayaatan ti ciudad ket maipaay.
Mainaig daytoy, ipaay ti congressional office babaen ti inisyatibo ti diputado ken kiddaw ni Mayor Alcid ti 10-milyon a pisos a medical assistance for indigent patient iti Laoag City General Hospital.
Malaksid iti daytoy, adda pay dagiti sumaruno a maipaay a medical equipment tapnu naan-anayen nga agbalin a level 2 hospital ti Laoag City General Hospital nga immunan nga adda ti resolusyon a naipasa iti Sang Panlungsod ditoy ciudad.
Kabayatanna, naipaima metten ti 1000 a food packs ditoy ciudad ti Laoag para kadagiti naapektaran iti napalabas a bagyo ken epekto ti habagat.
Mainaig iti daytoy, nagyaman ni Mayor Alcid kenni Cong. Sandro Marcos iti ipapaayna a tulong ditoy ciudad.
