LAOAG CITY – Nangipaay ni President Ferdinand Marcos Jr. ti nasurok a P1 million a financial assistance iti pamilya dagiti natay ken nadangran iti napasamak a pammaltog iti pagadalan idiay Tacloban City.
Malaksid iti daytoy, binilin na dagiti maseknan nga ahensya ti gobierno a paigetan da pay dagiti maipatpatungpal a safety measures kadagiti pagadalan iti intero a pagilian.
Iti Palace press briefing, inrakurak ni Palace Press Officer Claire Castro a maladingitan unay ti presidente iti insidente no sadinno nga indiskribir na daytoy a makapadudog iti puso gapu ta agpapada dagiti biktima ken suspek a menor de edad.
Segun ken ni Castro, mangipaay ti Office of the President ti sag-P150,000 ti pamilya dagiti tallo a pimmusay nga estudyante idinto a sag-50 ribo a pisos dagiti 18 nga estudyante a nasugatan iti insidente.
Inlawlawag ni Castro a ti tulong manipod iti opisina ti presidente ket naisina iti ipaay a tulong ti Department of Social Welfare and Development (DSWD) ken ti Department of Education (DepEd).
Innayon ni Castro nga adda ti ar-aramiden nga addang ti administrasyon tapno mapapigsa pay ti seguridad kadagiti pagadalan kalpasan ti pammaltog idiay Tacloban City.
Karaman kadagiti addang ket ti pannaka-instolar ti metal detectors ken closed-circuit television (CCTV) cameras kadagiti pagadalan, ken ti naiget a koordinasyon dagiti nagannak ken opisyal ti baragngay.
