LAOAG CITY – Kinanselar ni Indonesian President Prabowo Subianto ti plano na a panagbiyahe nga agturong idiay China gapu iti mapaspasamak a tignay protesta iti Jakarta no sadinno nga addan ti sumagmamano a regional parliament buildings ti pinuuran dagiti demonstrador.
Nangipatungpal ti tignay protesta dagiti naruay a residente gapu iti maipagarop a kumarkaro a korapsyon iti pagilian.
Naka-schedule koma a mapan agatendar ni Prabowo iti “Victory Day” parade idiay China intono Setyembre 3 kas paset ti maika-80 a selebrasyon ti isusuko ti Japan ken panagngudon ti World War II.
Inbatad ni presidential spokesperson Prasetyo Hadi a kalikagom ni Presidente Prabowo nga itultuloy ti panagmonitor iti sitwasyon ken agbiruk ti kasayaatan a solusyon.
Gapu iti daytoy, nagpadespensar ti Indonesian President iti gobierno ti China gapu ta saanen a makaatendar iti imbitasyon da kenkuana.
Malaksid iti daytoy, ikonkonsiderar pay ni President Prabowo ti mangkanselar ti panagbiyahe na para iti panagatendar na iti United Nations General Assembly session ita metlaeng a bolan.
