LAOAG CITY – Nagpadespensar iti publiko ti President ti Philippine Nurses Association (PNA) ditoy Ilocos Norte kalpasan a nagviral ti video na a mangibagbaga nga adda ti dua a kaso ditoy probinsya a nakaalarmaan dagiti residente.
Iti eksklusibo nga interview ti Bombo Radyo Laoag ken ni Mr. Jurgen Rushel Rapacon, presidente ti PNA ditoy Ilocos Norte ken chief nurse ti Karmeli Hospital ditoy ciudad ti Laoag, inadmitir na a saan na nga ipagarop nga agresulta daytoy ti panagpanic ti kaadoan.
Inlawlawag na nga iti laeng group chat ti asosasyon da ti nangisendan na ti video na ngem saanna nga inpagarop a maipost daytoy iti social media kangrunaan na iti facebook.
Immuna iti daytoy, inbatad ni Rapacon nga adda dagiti papagayam na a nagi-share iti facebook nga addan kaso ti coronavirus iti region I karaman ditoy iti Ilocos Norte ngem saannan nga inberipikar no pudno wenno saan.
Innayon na a gagem laeng ti inaramid na ket tapno mapagalerto dagiti pada na nurse kontra iti coronavirus.
Kuna na a gapu iti daytoy ket nakapungtot ni Governor Matthew Marcos Manotoc ken inbaga na nga “irresponsable” ti inaramid na.
Gapu iti daytoy, iti isasango na iti media ket dagus a nagpadespensar ni Rapacon, kagiddan ti panangipasigurado na nga awan pay ti kaso ti coronavirus ditoy Ilocos Norte ken intero a Region I.
