LAOAG CITY – Naglikudan ni Mr. Cristeto Subia, ti presidente ti asosasyon dagiti Senior Citizen iti Brgy. 10 iti ili ti Bacarra ti alegasyon a gutgutigutenna dagiti pada na a senior citizen a saan nga agpabakuna iti booster shot ti covid-19 vaccine.
Segun ken ni Subia, ti inbasa na kadagiti pada na a senior citizen kabayatan ti taripnong da idi kalman ket ti naipost iti social media a maipagarup nga inbaga ni presidente Rodrigo Duterte a saanen a mabalin ti booster shot kadakuada.
Nu pay kasta, inbatad na a pinalagipan na met laeng dagiti pada na a senior citizen nga adda kadagitoy ti desisyon no agpabakuna wenno saan.
Mainaig iti daytoy, inpetteng ni Subia nga awan ti kalikagum na a mangibaga a nasakit ti booster shot.
Inlawlawagna nga inbinglay na laeng ti kapadasanna nu sadino a nakarikna ti panagpipikel ti takyag ken nadagsen ti bagbagi na iti tallo nga aldaw kalpasan a nakaawat iti booster shot.
Kabayatanna, immunan nga inpakaammo ni Subia a ti maipagarup a video ti presidente ket nakita na laeng iti post ti maysa a barangay health worker (BHW).
