LAOAG CITY – Ginutigot ni Presidente Rodrigo Duterte dagiti mayor ken barangay chairmen a kitaen da dagiti residente a saan pay a nabakunaan kontra iti COVID-19.
Kuna na a nasken nga ipatungpal da ti kinabileg da iti panangimbitar kadagiti residente a saan pay a natudukan ti COVID-19 vaccine.
Inpakammo ti presidente nga umaboten ti 25 a milyon a Pilipino dagiti nakumpleto a nabakunaan idinto a 30 a milyon dagiti natudokan ti first dose.
Inbatad ni Duterte a target da a mabakunaan ti 50 a milyon a Pilipino sakbay nga agngudo iti daytoy a tawen.
Kabayatanna, nagyaman ti presidente iti namarsua gapu ti panagbaba ti kaso ti COVID-19 a maimaldit iti kada aldaw.
