LAOAG CITY – Mamati ni dati a Bayan Muna Partylist Rep. Neri Colmenares a mabuteng ni Presidente Rodrigo Duterte iti International Criminal Court (ICC).
Reaksyon daytoy ni Colmenares kalpasan nga inrakurak ni Presidente Duterte nga agikkat ti Pilipinas iti Rome Statute a nangbuwangay ti ICC.
Inpetteng ni Colmenares a mabalin a nakita ni Duterte a napigsa dagiti ebidensya a naidatag iti ICC kontra kenkuana.
Inlawlawag na a no dakkel ti pammati ti presidente a mangatiw ti sangsangwen na a kaso iti ICC ket saan koma a kastoy ti nagbalin a desisyon na.
Innayon na a kayat laeng a liklikan ni Duterte ti iyuswat nga imbestigasyon ti ICC kontra kenkuana.
Maipalagip a nangipila da Magdalo-Partylist Rep. Gary Alejano ken ni senador Antonio Trillanes IV ti kaso a crime against humanity iti ICC kontra ken ni Presidente Duterte.
