LAOAG CITY – Masirsirmata ni Presidente Ferdinand Marcos Jr. nga ad-adda a palawaen ti administrasionna ti Kadiwa stores initiative iti intero a pagilian iti panangikagumaanna a mangpababa iti presio dagiti taraon ken dadduma pay a tagilako iti agrikultura.
Iti maikadua nga State of the Nation Address ti Presidente, dinakamat ni Marcos ti akem dagiti pagtagilakuan iti Kadiwa nga initiatibo ti Department of Agriculture (DA) a direkta a mangikonektar kadagiti agpatpataud iti taraon kadagiti konsyumer tapno makissayan ti gastos iti pannakapalag-an ti presio dagiti bagas, karne, ikan, nateng ken asukar.
Segun ken ni Marcos, napaneknekan a kabaelan a maipababa ti presio ti bagas, karne, ikan, nateng ken asukar rason a dakkel a tulong ti Kadiwa stores a naminsan a nabiag ken nairubuat iti pagilian.
Inpakita ti datos manipud iti Philippine Statistics Authority a bimmaba ti food inflation, a mangsurot iti panaggaraw ti presio iti “basket” dagiti taraon a gagangay a gatangen dagiti pamilia, iti maikalima nga agsasaruno a bulan idi Hunio iti 6.7% manipud iti 7.5% idi Mayo.
Inbatadna nga agingga ita ket addan 7 a ribu a pagtagilakuan ti Kadiwa iti intero a pagilian, a nangipaay iti nalaklaka a tagilako iti agarup 1.8 milion a pamilia.
Kinuna ni Marcos a dagiti pagtagilakuan ti Kadiwa ket nakapataud iti dandani 700 a milyon a pisos a birok ken nangipaay iti pagbiag dagiti kameng ti nasurok a 3,000 a kooperatiba.
Dinakamat ti Presidente ti panagtitinnulong dagiti ahensia ti gobierno nasional, dagiti lokal a gobierno ken ti sibubukel a sektor ti agrikultura iti pannakapapigsa ti gannuat ti Kadiwa.
Maipalagip nga itay napan a lawas, nagpirma ti Department of Agriculture (DA), Department of Trade and Industry (DTI), Department of Labor and Employment (DOLE), Department of Social Welfare and Development (DSWD), Department of the Interior and Local Government (DILG), Presidential Management Staff (PMS), ken ti Philippine Communications Office (PCO) iti maysa a memorandum of agreement iti pannakaipasdek ti Kadiwa ng Pangulo iti intero a pagilian.
