LAOAG CITY – Inpakaammo ti Malacañang nga agpatingga ita nga aldaw, Disiembre 10 ti isolation ni Presidente Ferdinand Marcos Jr. kalpasan a nakaptan iti maikatlo a gundaway ti COVID-19.
Maiyannurot daytoy iti guidelines ti Department of Health nga inrekomendar ti 5 day isolation ti Presidente segun ken ni Communications Secretary Cheloy Garafil.
Maibasar iti naudi a diagnosis ti Presidente, nakarekobren ti Presidente iti COVID-19. Awan metten ti uyek, nasal congestion ken gurigor iti nasurok a 24 nga oras.
Nupay kasta, mairekomendar latta nga agusar ti Presidente iti face mask iti 10 nga aldaw bayat ti public engagement-na kas panagannad.
Immunan nga inrakurak ti Malacanang a nagpositibo iti nasao a sakit idi Disiembre 5.
Iti laksid ti panagpositibo ni Presidente Marcos, intuloyna latta ti panangipatungpalna kadagiti trabahona.
Maipalagip nga immunan a naapektaran ti Presidente iti COVID-19 idi Marso 2020 idi nagawid manipud iti panagbiahena idiay Spain. Narigatan ti Presidente iti nasao a sakit iti maikadua a gundaway idi Hulio 2022.
