LAOAG CITY – Binigbig ni Presidente Ferdinand Marcos Jr. ti ibilang na kas “indispensable role” wenno nakapatpateg nga akem dagiti kameng ti media iti pagilyan.
Inaramid na daytoy kabayatan ti panagbitla na kas naisangsangayan a bisita iti maika-50 nga anibersaryo ti Kapisanan ng mga Brodkaster ng Pilipinas (KBP) a naiyuswat iti Manila Polo Club, Forbes Park, Makati City.
Inbatad ni Presidente Marcos a maysa a karit a sangsangwen ti Kapisanan ng mga Brodkaster ng Pilipinas iti agdama ket no kasanu a maipasigurado ti integridad ken kredibilidad ti impormasyon.
Daytoy ket gapu ti kaado dagiti agwarwaras a peke a damag babaen kadagiti nagduduma a sites manipod iti social media.
Gapu iti daytoy, kinarit na ti Kapisanan ng mga Brodkaster ng Pilipinas a mangipaay wenno mangaramid ti measure of stability ken measure of objectivity tapno matulungan dagiti tattao a mangestablisar ti pudpudno a damag ken no ania ti propaganda.
Innayon ni Presidente Marcos a ti press ken broadcast media ket instrumento saan laeng a mangimpormar kadagiti Pilipino no di ket trabaho da pay ti mangmuli ti opinyon ti publiko, mangpatibker ti social mobilization ken panagbalbaliw.
Mainaig iti daytoy, ginutigot ni Presidente Marcos ti Kapisanan ng mga Brodkaster ng Pilipinas nga itultuloy ti napateg a trabaho kadagiti tattao ken iti gobierno kagiddan ti pangipasingked na ti naan-anay a suporta ti administrasyon na.
