LAOAG CITY – Inbilin ni Presidente Ferdinand Marcos Jr. ti pannaka-rebisar ti curriculum iti Philippine Military Academy (PMA) tapno maasa ti kabaelan dagiti kadete iti baet dagiti rumrumuar ken sangsangwen a karit iti pagilian.
Iti panagbitla ni Presidente Marcos kagiddan iti panagturpos ti Philippine Military Academy (PMA) Bagong Sinag Class of 2024 idiay Baguio city, inbilin na ti nasao a direktiba iti Department of National Defense ken Armed Forces of the Philippines tapno masigurado a dagiti kadete ket naikkan kadagiti paglaingan para iti maika-21 a siglo a kasapulan para iti pananglaban kadagiti pangta iti seguridad.
Inpetteng ti presidente nga iti digital battlefield, napateg a gameng ti nalawag a vision para iti kinapudno kasta pay ti integridad tapno malabanan dagiti panaggandat nga agiwaras kadagiti disinformation ken infiltration.
Ni Presidente Marcos ti guest of honor ken keynote speaker iti Philippine Military Academy Commencement Exercises para iti Bagong Sinag Class of 2024 iti PMA Borromeo Field, Fort Gregorio del Pilar, Laoakan iti Baguio city.
Inpresentar pay ni Presidente Marcos dagiti diploma ken awards dagiti nagturpos.
Adda ti pakabuklan a 278 a kadete dagiti nagturpos iti Bagong Sinag Class of 2024 no sadinno a 143 kadakuada ket agserbi iti army, 62 iti Air force ken 73 iti PH navy.
