LAOAG CITY – Inpasingked ni Presidente Ferdinand Marcos Jr. ti panangipaay ti gobierno ti naan-anay a suporta ken tulong para kadagiti atleta iti pagilian.
Iti panagbitla ni Presidente Marcos iti pormal a panaglukat ti Palarong Pambansa 2025 a naiwayat iti Ferdinand Edralin Marcos Stadium, inpalagip na kadagiti amin nga atleta a mangabak man wenno saan ket saan da koma a maup-upay gapu ta ti tao a lumablaban ket awan pulos ti pannakaatiw na.
Inbatad na nga amin dagiti atleta ket gagem na ti makagun-od ti medalya ngem ti laglagipen da a mabigbigbigen dagitoy a kampeoan gapu ta isuda ti maibilang a kalaingan iti pagadalan kasta met iti bukod da a probinsya ken rehiyon.
Kuna na a napintas dagitoy nga ehemplo para kadagiti agtutubo a Pilipino nga adda arapaap na iti biag ken determinasyon tapno matungpal daytoy.
Mamati ti presidente a kadagupan kadagiti atleta iti Palarong Pambansa 2025 ket adda ti posibilidad na a kadagiti sumarsaruno a tawen ket isudan to metten ti mangibagi iti Pilipinas para iti Asian Games ken Olympics kas kada Hidilyn Diaz, Manny Pacquaio, Carlos Yulo ken dadduma pay.
Inbalakad ni Presidente Marcos nga itultuloy laeng dagiti atleta ti agsanay, agadal a nasayaat, tungpalen dagiti nagannak ken taripatwen ti salun-at.
Innayon na nga adda laeng iti likudan dagitoy ti gobierno ken tulungan da dagiti atleta a manggun-od iti arapaap da gapu ta iti kada panangabak da ket maibilang metten a panangabak ti amin.
Nupay kasta, malaksid iti panangabak ket napatpateg a masursuro ti disiplina, kinapateg ti pannakipagayam, ken ti agenjoy iti paborito da nga ay-ayam, mangabak da man wenno maabak.
Inpaganetget pay ti presidente a saan nga isardeng ti lumaban agingga a saan a mangabak ken agballigi.
Kabayatanna, saan met a nalipatan ti presidente ti nagyaman kadagiti nagannak, mangisursuro, kasta pay dagiti trainer ken coaches, ken amin nga adda iti likudan para iti pannakaipatungpal ti Palarong Pambansa 2025
