LAOAG CITY – Target ti gobierno ni Presidente Ferdinand Marcos Jr. a makaibunong ti pakabuklan a 1,552 a Patient Transport Vehicles iti kada local government unit iti interno a pagilian tapno adda ti alisto a pakailuganan dagiti pasyente kadagiti ospital.
Iti panagbitla ni Presidente Marcos iti pannakaibunong dagiti Patient Transport Vehicles idiay Cagayan de Oro City, inpanakkel na a nakaibunungen ti Philippine Charity Sweepstakes Office ti 567 a behikulo para kadagiti pasyente idinto a 985 pay ti plano nga ibunong sakbay nga agngudo ti 2025.
Kuna na a no malpas ti distribusyon, namnamaen ti amin a 1,493 a Local Government Units iti intero a Pilipinas ket maaddaan ti saggaysa a bukod a Patient Transport Vehicles idinto nga adda ti sumagmamano a maipaayan ti sagdudua.
Kiniddaw ni Presidente Marcos kadagiti lokal a gobierno a taripatwen ken annadan dagiti maipaay kadakuada a Patient Transport Vehicles tapno ado ti maserbian na.
Ti nasao a programa ket adda iti babaen ti medical transport vehicle donation program ti Philippine Charity Sweepstakes Office a paset ti kalikagom da a papigsaen ti access iti kada Pilipino iti de-kalidad a serbisyo medikal, kangrunaan na kadagiti lugar nga adayo ket kurang iti pasilidad na.
