LAOAG CITY – Inpasigurado ni Presidente Ferdinand Marcos Jr. nga adda ti umdas a langis ti Pilipinas a mabalin nga agpaot iti 50 agingga iti 60 nga aldaw iti baet ti kumarkaro a tensyon iti Middle East a namnamaen a mangitunda ti panagngato ti presyo ti langis iti intero a lubong.
Segun iti Presidente, nupay possible a ngumato ti presyo ti langis gapu iti geopolitical tensions, saan a dagus a maibusan ti pagilian gapu iti stockpile ti gasolina, fuel oil, ken kerosene.
Innayon na a dagiti supplier ti petroleum products ket addaan ti bukod nga imbentaryo a mabalin paylaeng nga iruwar a mangipaay ti nayun a suplay para iti pagilian.
Binigbig ni Marcos a ti susik iti Middle East ket mabalin a mangitunda ti dakkel nga epekto ti presyo iti lubong isut gapuna nga ad-adalen ti gobierno dagiti contingency measures tapno mapalag-an ti epekto na kadagiti aggatang.
Karaman ditoy dagiti addang tapno maalay-ayan ti padagsen kadagiti umili ken negosyo no agtultuloy a ngumato ti presyo ti fuel.
Inrakurak pay ti presidente ti namnama na a saan nga agpaot ti riribok iti Middle East, basar iti nagbalin nga statement ti Amerika nga umabot laeng ti uppat agingga iti lima a lawas.
