LAOAG CITY – Maladingitan ni Presidente Ferdinand Marcos Jr. kalpasan a nakumpirmaran nga addan ti nairekord a Filipino casualty iti gubat iti nagbaetan ti Estados Unidos, Israel ken Iran.
Segun ken ni Presidente Marcos, ti biktima ket maysa Pinay caregiver nga agtrabtrabaho iti Israel.
Kuna na a ti biktima ket nabigbig a ni Mary Anne Velasquez De Vera a taga Pangasinan.
Inbatad ni Presidente Marcos a ti report kenkuana, kabayatan ti panangtultulong ti pinay caregiver iti amo na a mapan iti bomb shelter ket isu metten ti pannakatama na ti shrapnel dagiti nagdisso a bomba.
Innayon na a mismo a ti asawa ti pimmusay a pinay caregiver ti nangbigbig kenkuana no sadinno nga agtrabtrabaho metlaeng daytoy idiay Israel.
Inkari ni Presidente Marcos nga amin a tulong a kasapulan ti pamilya ti pimmusay a pinay caregiver ket ipaay ti gobierno.
Kuna pay ti presidente nga agtultuloy ti panagmonitor ti gobierno iti sitwasyon dagiti Pilipino a maip-ipit ti gubat iti Middle East.
