LAOAG CITY – Naiget ti panagmonitor ni Presidente Ferdinand Marcos Jr., iti sitwasyon ken epekto ti Bagyo Julian a tuptuparen na ti northern luzon.
Iti ambush interview iti Tarlac ken ni Presidente Marcos, inbatad na a naka-preposition metten dagiti maibunong a tulong para kadagiti umili a kangrunaan a naapektaran ti iduduprak ti bagyo Julian.
Inpakaammo ti presidente nga agturong koma ditoy Ilocos ngem saan a natuloy gapu iti kinapigsa ti tudo a gubuay ti dakes a panawen.
Innayon na nga ad-adda pay a pumigsa ti bagyo isut gapuna a pagan-annaden na ti publiko.
Nagpanawagan daytoy iti publiko nga agalerto kangrunaan na kadagiti lugar a tuptuparen ti bagyo.
Inpasigurado ti presidente a nakatutuk ti amin a maseknan nga ahensya ti gobierno tapno mangipaay ti kasapulan dagiti apektado ti bagyo.
