LAOAG CITY – Inbilin ni Presidente Ferdinand Marcos Jr. iti Department of Education a tutukan ti ad-adda pay a panagsanay dagiti mangisursuro, ipaayan ti nutrisyon dagiti agtutubo ken isardeng dagiti mapaspasamak a bullying kadagiti pagadalan uray iti online.
Inaramid daytoy ti presidente iti naiyuswat a sectoral meeting iti Palasyo ti Malakayang.
Segun ken ni Department of Education Spokesperson Undersecretary Michael Poa, rumrumuar iti Programme for International Student Assessment wenno PISA assesment idi May 2022 agingga iti March 2022 nga adda iti low proficiency dagiti estudyante.
Gapu iti daytoy, inbatad ni Poa ken Department of Education Undrsecretary Gina Gonong nga iti biang dagiti mangisursuro, kasapulan da ti specialization wenno masters degree gapu ta saan a makaumanay iti pannakapasa laeng iti Licensure Examination for Teacher ti maysa a mangisursuro.
Makikoordinar met ti Department of Education iti Department of Social Welfare and Development para iti naur-urnus a feeding program no sadinno nga ita a tawen ket adda iti P11.7 bilyon a pisos ti pondo a nailatang para iti nasao a proyekto.
Inrakurak ni Poa nga addan ti ar-aramiden da nga addang tapno maisardeng ti mapaspasamak a bullying iti pagadalan, pakairamanan ti cyber bullying.
Naituding a mangbukel ti Department of Education ti Child protection committee kadagiti pagadalan tapno mamonitor ti kaso ti bullying.
