LAOAG CITY – Inpasingked ti Palasyo ti Malakanyang a saan nga agpadiktar ni Presidente Ferdinand Marcos Jr. iti aniaman a panawagan a saan nga usto ken maikanniwas iti linteg.
Daytoy ket kalpasan kadagiti rakurak ti sumagmamano a kaalyado ken supporters ni dati a Presidente Rodrigo Duterte a no sinsero ni Presidente Marcos a makikapya ket masapol nga isubli na iti pagilian ti dati a presidente.
Maipalagip nga immunan nga inrakurak ni Presidente Marcos iti maysa a podcast interview a nakasagana a makikapya kadagiti Duterte.
Inpetteng ni Palace Press Officer USec. Claire Castro a saan nga agpatingngel wenno agpadiktar ni Presidente Marcos ken saanna a tallikudan wenno baliktaden ti linteg tapno laeng pagserbian ti personal nga interes ti sumagmamano nga indibidual.
Inpaganetget pay ni Castro a ti pannakikapya ket masapol nga awan ti kondisyon na.
Inlawlawag ni Castro a saan laeng a dagiti Duterte ti ibagbaga a pakikapyaan ni Presidente Marcos no di ket para iti amin.
Innayon ni Castro nga ad-adda a pilyen ni Presidente Marcos ti linteg imbes a ti pagayam.
