LAOAG CITY – Inpasigurado ti Malakanyang a saan nga ipalubos ni Presidente Ferdinand Marcos Jr., nga adda dagiti kwestiyunable a proyekto a mailipit iti 2026 national budget.
Sungbat daytoy ti Malakanyang kalpasan nga inbutaktak da House Deputy Speaker Ronaldo Puno ken Marikina Representative Marcy Teodoro nga adda dagiti kwestiyunable a proyekto a nakita da iti babaen ti 2026 National Expenditure Program (NEP).
Partikular a dinakamat ni Rep. Puno dagiti priority projects manipod iti distrito na a nagpukaw iti National Expenditure Program.
Iti met biang ni Rep. Teodoro, ti proyekto a nailanad iti National Expenditure Program ket nakumpleton ngem nailatangan manen ti pondo iti 2026 National Expenditure Program.
Segun ken ni Palace Press Officer USec. Claire Castro, a saan a dagus nga husgaran ti isyu, makikoordinar nga umuna dagiti agpanpanday linteg iti Department of Public Works and Highways mainaig iti nakita a kwestiyunable a proyekto ken amwen a nasayaat ti detalye ti proyekto.
Inpetteng ni Castro a no mapaneknekan a pudno a naipalipit ti proyekto iti 2026 budget ket sigurado a saan nga ipalubos ni Presidente Marcos.
