LAOAG CITY – Inbatad ni Mr. Froilander Agdeppa, Presidente ti Discolandia Owners Managers Association iti Barangay 1 ditoy ciudad ti Laoag a plano da ti umapela iti Inter-Agency Task Force for the Management of Emerging Infectious Diseases (IATF-EID) tapno mapalubusan dan nga agoperar.
Daytoy ket kalpasan a napalubusanen dagiti sumagmamano a pasdek negosyo nga agoperar, ken adda payen dagiti establisimiento a napalubusan nga aglako ken agiserbi ti arak ken dadduma pay.
Inkari ni Agdeppa a no mapalubusan da nga agoperar ket naiget nga ipatungpal da ti social distancing.
Innayon ni Agdeppa a no agoperar manen ti discolandia ket maaddaan ti pagsapulan dagiti dadduma a tattao ken makatulong da met iti ekonomiya ditoy ciudad ti Laoag ken Ilocos Norte.
Maipalagip a sipud naipatungpal ti quarantine gapu iti covid-19 ket nagsardeng metten ti operasyon iti discolandia isut gapuna a dagiti agtrabtrabaho iti daytoy a lugar ket naggaawid dan iti bukod da a lugar.
