LAOAG CITY – Inaprobaranen ni Ferdinand Marcos Jr. ti panaglukat ti klase inton Hulio 29, 2024 ken agngudo inton Abril 15, 2025 para iti school year 2024-2025.
Ti nasao nga addang ket para iti in-inut a panagsubli ti school days iti traditional arrangement.
Idi kalman ket kinataripnong ni Presidente Marcos ni Vice President ken Department of Education Secretary Sara Duterte iti Palasyo ti Malacañang no sadino nangiprisentar ti dua nga option tapno maisubli ti dati a June to March ti school calendar.
Ti immuna nga opsiyon ket maaddaan ti 180 school days ken 15 in-person Saturday classes idinto ti maikadua nga opsiyon ket maaddaan ti 165 school days ken awan ti in-person Saturday class nga agpada nga aglippas inton Marso 31, 2025.
Nupay kasta, inbatad ni Presidente Marcos nga ababa ti 165 nga aldaw ken saanna a kayat a sumrek dagiti estudiante tunggal Sabado.
Inlawlawagna nga imbes nga agngudo iti Marso 31, 2025, nasken nga i-adjust ti Department of Education ti school year inton Abril 15, 2025 tapno makumpleto dagiti estudiante ti 180 nga aldaw a saanen a kasapulan pay a sumrek iti kada Sabado.
Para iti school year 2025-2026, agsublin iti Hunio ti serrek ken aglippas iti Marso inton sumaruno a tawen, inton 2026 wenno ti dati a tradisyunal nga school calendar.
