LAOAG CITY – Inimatangan ni Presidente Ferdinand Marcos Jr., ti panagpirma da Defense Secretary Gilberto Teodoro ken Japanese Foreign Minister Kamikawa Yoko ti Philippines-Japan Reciprocal Access Agreement.
Ti panagpirma ket naiyuswat iti Palasyo ti Malakanyang.
Papigsaen ti nasao a katulagan ti military cooperation iti nagbaetan ti dua a pagilian iti babaen ti maaddaan ti panagsinnukat ti military drills and exercises iti nagbaetan dagiti suldado ti Pilipinas ken Japan.
Nadakamat a ti Reciprocal Access Agreement ket nabukel iti inaugural Philippines – Japan Foreign and Defense Ministerial Meeting idi Abril 2022 a naiyuswat idiay Tokyo, Japan.
Idinto ita nga aldaw met ket pormal a malukatan ti maikadua a defense ken security talks wenno 2+2 meeting iti pagilian no sadino manamnama a matalantan ti isyu iti bilateral, defense ken security a makaapektar iti rehion.
Kabinnulig daytoy ti Department of National Defense pakairamanan dagiti dadduma a delegasion manipud iti Department of Foreign Affairs ken Department of Justice.
