LAOAG CITY – Ad-adda a ni Presidente Rodrigo Duterte ti maapektaran iti alegasyon na nga agus-usar ti cocaine ti maysa a presidential candidate intono May 2022 elections.
Daytoy ti inbatad ni Mr. Herdy Yumol, maysa a sociologist ken Professor iti Mariano Marcos State University (MMSU).
Inpalgak ni Yumol a saan a maliklikan nga adda ti pannakaapektar ni dati a senador Bongbong Marcos ngem ad-adda nga agballatek ken ni Presidente Duterte.
Inlawlawag ni Yumol a naadalanen dagiti tattao a no panawen ti eleksyon ket naipagagangayen nga adda dagiti pammerperdi a mapaspasamak kadagiti kandidato.
Nupay kasta, kuna ni Yumol a maysa laeng ti panpaneknekan ti nagbalin a rakurak ni Presidente Duterte, daytoy ket mangipasimudaag a ni dati a senador Marcos ti frontliner iti presidential race iti mapaspasangasangan nga eleksyon.
Mainaig iti daytoy, positibo ni Yumol a ti nagbalin a rakurak ti presidente ket gapu laeng iti pulitika ngem ti relasyon ti Marcos ken Duterte ket agtalinaed a natibker.
