LAOAG CITY – Inpetteng ti Malacañang a saan nga obligasyon ni Presidente Rodrigo Duterte nga ipakita iti publiko ti linaon ti Statement of Assets, Liabilities, and Net Worth (SALN) na.
Sungbat daytoy ti Malacañang iti rimuar a report iti Philippine Center for Investigative Journalism (PCIJ) a napaay ti Office of the Ombudsman ken Office of the President a mangipaay ti kopya ti SALN ni Presidente Duterte para iti tawen 2018.
Segun ken ni Presidential Spokesperson Salvador Panelo, sumursurot ti chief executive iti naipalaon iti konstitusyon a panangipasa ti SALN iti usto nga oras.
Binalakadan pay ti sekretaryo ti PCIJ a kiddawen da ti orihinal a kopya dagiti SALN ti presidente, bise presidente ken amin a kameng ti constitutional bodies.
Innayon na a saan a mabalin a diktaran ti Palasyo ken Ombusman iti kayat na nga aramiden gapu ta naisina ken nawaya daytoy nga institusyon, ken awan ti kontrol da iti daytoy.
