LAOAG CITY – Inpakaammo ni Mrs. Celestina Paz, ti Presidente ti Kapisanan ng mga Brodkaster ng Pilipinas ditoy Ilocos Norte a saan a pulos a mapukaw iti kinapateg ti radyo iti baet ti panagtulid ti panawen.
Daytoy ket kagiddan ti pannakaselebrar ti World Radio Day ita nga aldaw, Pebrero 13.
Kinunana a babaen iti radyo ket maipadanon dagiti kangrunaan a damdamag kadagiti umili no ania dagiti kaudian a mapaspasamak iti maysa a lugar.
Inbatadna iti baet dagiti baro a teknolohia a maus-usar kadagiti nagduduma a media platform ket saan nga agpaudi iti benneg ti radyo gapu ta nagtalinaed latta ti kinapartak daytoy iti panangipadamag nangruna no adda ti didigra.
Inlawlawagna nga agpukaw man ti kuriente wenno internet ket agtultuloy latta nga adda iti tangatang dagiti agirakrakurak aniaman a kalamidad ti sumangbay.
Inpalgakna iti baro nga henerasion ket aliston ti panagwaras ti impormasion babaen iti social media rason a masapol ti ad-adda a panangtingiting kadagiti mabasbasa a detalye.
Kabayatanna, inpalagip ti Presidente ti Kapisanan ng mga Brodkaster ng Pilipinas ditoy Ilocos Norte iti panagbalin kas maysa kadagiti sanggir ti kinapudno ken patas a panangiwarnak.
