LAOAG CITY – Nagyaman ni Mr. Richard Ramos Jr., ti Presidente ti Laoag City Federation of Person’s With Disability iti City Government gapu iti panangipursigeda ti free cinema wenno ti libre a panagbuya dagiti adda ti rangkap ti bagina pakairamanan dagiti Senior Citizens a residente ditoy siudad ti Laoag.
Segun kenkuana, dakkel a makatulong daytoy kadakuada kas liwliwa dagiti maseknan nga indibidual.
Inbatadna a ti rangkap ti bagi dagiti Person’s With Disability ket maysa a nadagsen a mapaspasaranda isu a napintas nga adda ti free cinema nga inaramid ti lokal a gobierno kabinnulig ti dakkel a mall tapno mangipaay ti ragsak kadakuada.
Inlawlawagna a makitaripnong daytoy iti Presidente met ti Senior Citizens tapno kitaen no kasano ti aramidenda nangruna ket adda ti 80 a barangay ditoy siudad ti Laoag.
Innayonna a 100 nga indibidual laeng ti mabalin a maakomodar iti tunggal aldaw ti Lunes ken Martes iti kada lawas.
