LAOAG CITY – Inbatad ni Mr. Hadji Aqmad Aduma, presidente ti Muslim Compound ditoy ciudad ti Laoag a binalakadan na dagiti pada na a muslim a masapol nga agridam da amin.
Daytoy ket kalpasan nga adda ti alert memo manipod iti Northern Luzon Command (NOLCOM) mainaig iti maipagarop nga iraraot dagiti terorista iti Rehiyon uno, pakairamanan ditoy probinsya nga Ilocos Norte.
Iti eksklusibo nga interview ti Bombo Radyo Laoag ken ni Aduma, inbatad na a nagpa-instular ti CCTV iti intero a compound da tapno mamonitor da ti aglawlaw da.
Kuna na a nakitaripnong da payen iti Philippine National Police (PNP) mainaig ti daytoy nga isyu.
Inlawlawag na a nagturong da a muslim ditoy ciudad ti Laoag tapno umay agsapol ti pagbiag da ken awanen ti sabali a gagemda.
Mamati a ti gagem dagiti mangplanplano a mangriribok ket pagkokontraen na dagiti muslim ken kristiyano ngem inpasingked na nga isuda a muslim nga adda ditoy ciudad ti Laoag ket saanda a kayat ti gulo.
Kabayatanna, inbatad ni Police Lt. Col. Amador Quiocho, ti chief of police ditoy ciudad ti Laoag nga iti pannaki-dayalogo da kadagiti muslim iti panangidaulo ni Adoma ket naglikudan da nga adda ti ammo da maipanggep ti maibagbaga a terror attack.
Innayon na nga inkari da Adoma a nakasagana da a makitinnulong iti PNP no maamoan da nga adda ti saan a nasayaat nga aramiden dagiti pada da a muslim.
