LAOAG CITY – Nasakit ti nakem ni Mr. Henry Young, ti Presidente ti Parents-Teacher Association iti Nagbacalan Elementary School iti Barangay Nagbacalan iti ciudad ti Batac gapo iti maipagarop a saan a pannakausar ti kwarta a nasolicitan da.
Segun kenni Young, umabot iti 136 a ribo a pisos ti nasolicitan da ken naukkon babaen iti naiyuswat a koronasyon iti nasao a pagadalan.
Inlawlawag na a ti pondo ket mausar para iti pannakapapintas ti kantina iti pagadalan ken idi damo ket isuda ti nagtrabaho.
Nupay kasta, rumrumuar a kellaat a naipakontrata iti sabali ti pannakatarimaan ti kantina iti saan na a masinunuo a rason, kasta pay ti pannakaipan ti linya ti kuryente ken ti bombilya ke umabot iti 14 a ribo ti nagastos.
Sabali pay ti 12 a ribo a pisos a nagastos para iti pannakatarimaan ti parte ti entablado da.
Patien ni Young nga adda pay ti 73 a ribo a pisos a nabati manipud iti 136 a ribo a pisos ken daytoy ti mausar para iti kantina.
Nupay kasta, masdaaw daytoy gapo ta bassit laeng ti naaramid iti kantina a mabalin nga agbalor ti 20 a ribo a pisos idinto a rumrumuar a naibusen ti 73 a ribo a pisos.
Mainaig iti daytoy, kunana a nasukatan pay isuna kas presidente pakairamanan ti bise presidente agingga iti treasurer ken dagitoy ti nagpirma iti solicit da iti Sang. Panlungsod.
Ummuna iti daytoy, kunana a plinano na ti agikkat kas presidente iti Parents-Teacher Association gapo iti sakit ti nakem na a naipatrabaho iti sabali ti kantina, ngem saan a kinayat ti Division Office gapo ta naisarita a mailippas na ti School Year ken inbaga na met iti mangisursuro iti Grade 6.
