LAOAG CITY – Naiget a naglikudan ni Pastor Bong Pimentel, Presidente ti Parents Teachers Association iti Tamdagan Elementary School iti ili ti Vintar dagiti maiyak-akusar a reklamo kontra kenkuana.
Daytoy ket kalpasan nga adda ti naipadanon a reklamo ditoy Bombo Radyo Laoag a maipagarup nga agsingsngir ti multa ti maseknan a Presidente ti Parents Teachers Association iti nasao a pagadalan kadagiti nagannak.
Basar iti reklamo a naawat ti Bombo Radyo, agmulta ti 300 a pisos dagiti saan nga agatendar ti taripnong, 400 a pisos dagiti saan nga agatendar iti parada ti fiesta idinto nga agmulta met ti 500 a pisos saan nga agatendar iti panagdalus iti pagadalan.
Malaksid iti daytoy, basar kadagiti maseknan a nagannak ket no bilang saanda nga agbayad ti multa ket saanda a makapapirma ti clearance ken saan a maited ti card dagiti annakda.
Segun ken ni Pimentel, awan ti kinapudnona dagiti reklamo kontra kenkuana gapu ta ti nasao a pagalagadan ket maipatpatungpalen iti napalpalabas a tawen ken planoda nga ipatungpal manen.
Inbatadna a napanunutanda a napagtutulagan ti nadakamat a pagannurutan gapu ta kurang ti pundo ti pagadalan iti Maintenance and Other Operating Expenses.
Innayonna a mamati a dagiti agrekreklamo ket dagiti saan a nagatendar iti naisayangkat a taripnongda idi kalman.
Mainaig iti daytoy, iti panagturong ti Bombo Radyo Laoag News Team ket naammoan a nai-transfer iti napalabas nga aldaw ni Mr. Oscar Gamiao, dati nga School Head iti Tamdagan Elementary School idinto a saan a nadanon ti News Team ni Mr. Bong Agregado nga agdama nga Officer In Charge iti nasao a pagadalan.
Kabayatanna, inpaganetget ni Atty. Donato Balderas, Schools Division Superintendent ti Department of Education – Ilocos Norte a naiget a maipakpakat ti “No Collection Policy” iti ahensiada rason a saan nga umannugot daytoy ti kalikagum ti Presidente ti Parents Teachers Association iti Tamdagan Elementary School iti ili ti Vintar.
