LAOAG CITY – Kalikagom ni Mr. Danver Dela Cruz, ti Federated President ti Federation of Madongan RIS-IA IA President – San Marcelino Irrigators Association a maipangato koma ti presyo ti irik gapu ta narigat ti agtalon aglalo ket agkakangina dagiti mausar kas iti abono ken dadduma pay.
Malaksid iti daytoy, kuna ni dela Cruz a narigat payen ti agbiruk ti pagtalunen ken nangina ti pagtandan idinto a saan met a maipangato ti presyo ti irik.
Komento daytoy ni dela Cruz mainaig iti nairakurak ni Presidente Ferdinand Marcos Jr. nga agtalek a mapagtalinaed ti P20 iti kada kilo ti bagas kadagiti Kadiwa stores uray awan ti subsidy a maipaay para kadagiti mannalon.
Inpalgak ni dela Cruz nga uray awan ti subsidiya ket ado dagiti dadduma a tulong nga ipapaay ti gobierno para kadagiti mannalon kas kadagiti makinarya ken dadduma pay.
Nupay kasta, kuna na a ti laeng kalkalikagoman da ket ti pannakaipangato koma ti presyo ti irik no sadinno a nadakamat na a ti kapintasan ket P24-25 iti kada kilo tapno saanda a maatiwan nga agtaltalon.
Innayon na a ti koma pay a napintas a maaramid ket ti agtultuloy a panaggatang ti National Food Authority kadagiti produkto dagiti mannalon, ngem ti mapaspasamak ket buffer stock laeng ti al-alaen ti ahensya ken saanna a maakomodar amin a maapit dagiti mannalon iti intero a pagilian.
