LAOAG CITY – Maladingitan ni Mr. Danver Dela Cruz, ti Presidente ti Sanghera iti San Marcelino iti ili ti Dingras ken agdama a Rice Coordinator ti Regional Agricultural and Fishery Council iti desisyon ti National Food Authority a saanen a gumatang kadagiti irik a naapit paylaeng idi Marso ita a tawen.
Inpaganetget na a ti saan a panaggatang ti National Food Authority kadagiti maapit da nga irik ket arigna in-inut a patpatayen ti ahensya dagiti mannalon.
Immunan nga inlawlawag ti National Food Authority a no addan ti dua agingga iti tallo a bolan kalpasan a nagapas dagiti pagay ket saanen a napintas ti kalidad na no agbalin a bagas.
Nupay kasta, inpetteng ni dela Cruz a no nasayaat laketdi ti pannakaibilag dagiti irik ket napintas latta ti kalidad na kalpasan ti sumagmamano a bolan a pannakaipenpen ti produkto.
Inkalintegan na a kapilitan nga ipenpen da paylaeng dagiti maapit da no kalaka ti presyo ti irik gapu ta saan met a kayat dagiti mannalon a malugi da.
Innayon na a kasapulan nga iyuray da ti panagngato ti presyo ti irik tapno saan a dakkel ti agbalin a pukaw wenno pannakalugi da.
Mainaig iti daytoy, kuna ni dela Cruz nga iyuman nanto daytoy a banag iti kangatoan nga opisyal ti Department of Agriculture tapno ti nagbalin a desisyon ti National Food Authority ket masolusyonan babaen ti implementing body a pakairamanan na iti Regional sector.
Kabayatanna, inpalgak ni dela Cruz a no kastoy latta ti ar-aramiden ti National Food Authority ket agwelga da wenno allukuyen na dagiti pada na nga agtaltalon iti Barangay San Marcelino iti ili ti Dingras nga agmula da laengen ti tabako no sadinno nga ad-ado pay ti maipaayna a pagsayaatan iti intero nga ili.
