LAOAG CITY – Inlawlawag ni Mrs. Angie Ansagay, ti Presidente ti Tienbaro Association ken sekretaryo iti Meat Vendor Association ditoy ciudad ti Laoag no apay a saanda a kayat nga umakar ti slaughter house manipud iti Barangay 1 maipan iti Barangay Camanggaan ditoy ciudad.
Daytoy ket iti baet nga agpapan ita ket awan pay ti pormal a pakaammo kadakuada mainaig iti maibagbaga a pannakaiyakar ti slaughter house iti Barangay Camanggaan ditoy ciudad.
Inbatad na a ti maar-aramid nga slaughter house iti Barangay Camanggaan ket alisto a malayos ken nailet isut gapuna a limitado laeng ti maakamodar na a partidor.
Malaksid iti daytoy, nailet pay ti kalsada nga agturong iti slaughter house iti Barangay Camanggaan ken para kadakuada ket adayo unay a pagsublia-sublian dagiti trabahador da.
