LAOAG CITY – Immapela ni Mr. Francisco Martin, Presidente ti traysikelan ditoy ciudad ti Laoag kadagiti pada na a tricycle drivers nga agan-anus da gapu iti maipatpatungpal a coding iti agdama gapu iti pannapaiget ti covid-19 restriksyon.
Inbaga na nga adda pay dagiti pada na a tricycle driver a mangbab-babalaw kenkuana gapu iti maipatpatungpal a coding ngem inkalintegan na a saan nga isuna a mismo ti naggapoan daytoy a mandar no di ket iti metlaeng chief executive ditoy ciudad.
Inbaga na a gapu ta adda ti sursuruten da a coding ket mamintallo laeng a daras a makapasada ti maysa a tricycle iti kada lawas.
Kuna na a no mapalukayanen ti covid-19 restriksyon ket agsublin to manen ti normal a panagpasada da ditoy ciudad ti Laoag.
Inpakaammo na nga intono domingo, setyembre 26 ket mabalin da amin ti agpasada a traysikelan ngem intono lunes ket masurot to manen ti coding.
Mainaig iti daytoy, inadmitir ni Martin a gapu ta adda ti sursuruten da a coding ken saan nga inaldaw ti panagpasada da ket saan a maliklikan a basbassit ti mapasadaan da.
