LAOAG CITY – Inpeksa ni Mrs. Tessie Rosales ti presidente ti ZANJERA DE NAL-PAN-SUR PUMP IRRIGATORS ASSOCIATION INCORPORATED iti Brgy. Nalasin iti ili ti Paoay ti karirikna na iti saan a pannakaisubli ti tractor a naggapo iti Department of Agrarian Reform.
Segun ken ni Rosales, Hunyo 22, 2021 idi naiyawat ti tractor iti asosasyon da ken iti garahe nga asideg ti balayda ti naipalubos a pakaipanan daytoy.
Nu pay kasta, kuna na nga iti kabigatanna wenno idi Hunyo 23 ket saan a naibagbaga kenkuana a naala ti tractor babaen iti operator ti Zanjera a ni Gilbert Dumaoal, ti bise presidente a ni Ferdinand Fernandez ken treasurer a ni Juliet Dumaoal.
Inpakaammo ni Rosales a sipud iti dayta nga aldaw agpapan ita ket saanen a pulos a naisubli ti tractor nga isu kuma ti maisapol para iti zanjera.
Inbatad na a gapu iti saan a pannakaipakpakada ken panakaisubli ti tractor ket nagsasarita da iti barangay.
Nu pay kasta, ti ipetpetteng ti grupo ni bise presidente Fernandez ket masapol nga adda ti maipakita a dokumento a mangpaneknek nga agtalinaed iti kustoydar ti presidente ti tractor.
Innayun na nga adda pay ti gundaway a nagsasarita da iti kuerpo ti pulisya ngem arig nga awan ti nagbanagan ti panagsasarita da gapu ta saan latta a naisubli ti tractor.
Immuna iti daytoy, inpakaammo ni Rosales a ti kangrunaan a rason ti grupo ni Fernandez a nangala iti tractor ket ti panangiserrek na iti anak na a para rukod ken treasurer iti SEC.
Nu pay kasta, inlawlawag ni Rosales a ti nasao nga addang iti anakna ket temporary laeng ken masukatan met laeng iti posisyon nu adda ti mabirokan.
Kuna ni Rosales a sipud naala ti tractor manipod kenkuana ket nagudwa metten ti asosasyon da nu sadino nga agarup 50 a miembro ti simmurot kenkuana.
Inpakaammo na a ti maysa ket ti grupo ni Fernandez nga isu ti tumaktakder a presidente pakairamanan ti agarup 10 a miembro ti asosasyon.
Immuna iti daytoy, kuna ni Rosales a ti pay saanna a maakseptar ket ti pannakausar ti tractor babaen laeng iti grupo ni Fernandez ken amin a masapulan daytoy ket saan a maiyum-uman iti asosasyon da.
Inpetteng na nga arig a napukaw ti karbengan na iti tractor iti laksid nga isuna ti agdama a presidente ti asosasyon ken isu ti nakaiyawatan ti nasao a makinarya.
