LAOAG CITY – Inadmitir ni Senador Manny Pacquiao a nangipaay ti kuarta kadagiti tattao bayat ti kaadda idiay Batangas idi Huebes ngem inpetteng na a saan a vote buying daytoy.
Kuna na a ti inpaay na ket grocery items, bagas, ken kuarta a sangaribo a pisos.
Inlawlawag ni Pacquiao a ti panangipaay ti kuarta ken bagas ket tawen 2002 pay laeng nga ar-aramiden na.
Idi Huwebes, nagturong si Pacquiao iti Balayan, Batangas ken nangipaay ti relief packs kadagiti 7,000 a biktima ti Taal Volcano eruption.
Sakbay iti daytoy, binisita ni Pacquiao da Lipa City Mayor Eric Africa, Senate President Pro Tempore Ralph Recto ken ti asawa na a ni Batangas Congresswoman Vilma Santos-Recto.
Mainaig iti daytoy, inpakaammo ni Comelec spokesman James Jimenez a maipawil ti vote-buying, epektibo iti panawen ti panagkampanya.
Kabayatanna, naobserbaran nga arig awanen ti nasurot a health protocols kabayatan ti panagbisita ni Pacquiao gapu ti panagturong dagiti tattao.
Kuna ni Health undersecretary Maria Rosario Vergeire a nasken a panunuten da nga umuna dagiti maipatpatungpal a health and safety protocols para kadagiti aktibidad.
Nagpanawagan kadagiti local government units para iti pannakaipatungpal dagiti pagalagadan iti baet ti pandemiya.
