LAOAG CITY – Nangiyestablisar ni Presidente Ferdinand Marcos Jr. ti maysa a pangopisinaan a mangipaay ti proteksion kadagiti agtutubo gapu iti ngumatngato nga online child sexual abuse ken exploitation cases.
Iti Executive Order (EO) No. 67 a pinirmaan ni Executive Secretary Lucas Bersamin, nakailanad iti pannakabukel ti Presidential Office for Child Protection (POCP). Gagem daytoy a maprotektaran dagiti ubbing kontra iti physical ken mental distress.
Iti babaen ti Executive Order, responsibilidad ti Presidential Office for Child Protection nga imonitor ken siguradoen a maipatpatungpal dagiti programa ken pagannurutan ti gobierno.
Malaksid iti daytoy, nasken a matutukan pay ti pagsayaatan dagiti ubbing, ti anti-OSAEC, anti-child human trafficking matters ken anti-CSAEM (Child Sexual Abuse or Exploitation Materials).
Mainaig iti daytoy, masapol pay ti Presidential Office for Child Protection nga agisubmitir kadagiti policy recommendations iti Presidente.
Idauloan ti Presidential Office for Child Protection ti Presidential Adviser for Child Protection (PACP) ken idauloan ti Special Assistant to the President (SAP).
Kabayatanna, agbalin a miembro met ti Presidential Office for Child Protection National Coordination Center, Inter-Agency Council Against Trafficking (IACAT), Council for the Welfare of Children (CWC), National Council Against Child Labor (NCACL) ken Committee for the Special Protection of Children (CSPC).
