LAOAG CITY – Maladingitan ni Mr. Rod Sadian, Presidente ti Parents Teachers Association (PTA) iti Ilocos Norte gapu ta ngimmato manen ti kaso ti teenage pregnancy ditoy probinsya.
Inbatad na a segun ti datos ti Provincial Health Office (PHO), umaboten ti 1,051 dagiti menor de edad a nagsikog ita a tawen.
Inlawlawag na a 9 kadagitoy ket agtawen ti 10 agingga ti 14 idinto a dagiti 1,042 ket agtawen ti 15 agingga ti 19.
Kuna ni Sadian a nasakit para kadagiti nagannak ti panagsikog ti anak a menor de edad gapu ta saanna pay a madesisyonan ti bukod na a bagi.
Innayon na a ti nasapa a panagsikog ket isu ti kangrunaan na a pakaperdian ti masakbayan ti maysa a babai.
Gapu ti daytoy, inpakaammo ni Sadian a kiniddaw na ken ni Governor Imee Marcos nga itultuloy da latta a trataren ti pakaseknan ti teenage pregnancy.
